天然酵母之實驗 ~~~ 桂花酵

參考了多位養酵前輩的寶貴心得、經驗分享已有一段日子，終於鼓起勇氣當起養酵媽媽來！
對於我這個當面對一些突發或意料之外的事情，往往都不能冷靜地處理的性格來看，養酵可能己經是一個很大的課題；我常擔心我的照顧不周會令到我的酵母寶寶成為犧牲品，但見著別人家的可以健康成長、令包包變得有生氣，這點就促使我去冒這個險！
而今次揀選成為我第一個酵母寶寶的幸運兒就是 ~~~ 桂花！原本我一直想著用蕃茄的，因為見到其他養酵前輩都稱讚蕃茄養出的酵母活力充沛，但我又沒空去買優質的有機蕃茄，而家中只得放了多日的橙和檸檬，好像不夠新鮮。但又恐怕若果今天不開始的話，可能這份熱情又冷卻下來了，所以就找來"新鮮"買回來的《乾桂花》喇！

【第一天】5/12/2005 9:30pm

乾桂花 10g
涷開水 200g
砂糖 30g
蜜糖 10g

1. 將玻璃瓶用滾水燙過，放乾備用
2. 將所有材料放進玻璃瓶，稍為搖下令到所有桂花都能沾到水
3. 用保鮮膜蓋著瓶口，用叉刺幾個小孔以作通氣
4. 再蓋上瓶蓋

【第二天】6/12/2005 11pm
毫無動靜！

【第三天】7/12/2005 9:30pm

水份部份好像比較濃

【第四天】8/12/2005 7:00pm

直至到 ~~~

【第十二天】16/12/2005 7:00pm

可能因為天氣太過清涼(室外氣溫16度)的關係，到呢日至開始有些少泡泡出現！

香草意大利麵包(Focaccia)

成個星期都冇整到麵包，個心掛住掛住咁，所以今晚就把握時間整左冇食好耐的意大利香草包喇！本來諗住加埋酸瓜係面等個包包的顏色有紅有綠靚d，但係用既時候至發現冇買到，唯有都係等蕃茄乾獨當一面啦！

Bread Flour 315g
Cake Flour 135g
Sugar 25g
Salt 5g
Yeast 9g
Olive oil 90g
Water 250g

1. 所有材料拌勻後搓至滑身
2. 發酵40mins
3. 排氣後鬆弛5mins
4. 將麵團捍成同烤盤一樣大
5. 放入烤盤,以手指壓出一排排的洞
6. 可在洞內放蕃茄乾/橄欖粒7. 灑上Black pepper,herbs,minced garlec,rosemary
8. 發酵30mins
9. 塗上一層olive oil(但我塗了蕃茄乾樽內的油)及灑上海鹽
10. 入預熱180C焗爐焗15mins

綠茶紅豆慕士凍餅

今日我其中一個好朋友生日，所以專誠做了這個蛋糕送給她，希望她會喜歡啦！

Recipe in Comments

結婚一周年紀念

話咁快就一年喇！係呢一年裡面我學懂了很多相處的學問，亦都遇過之前從未想像到的事情，總算中規中矩的應付過了！未來的路還是很長的，但我相信我倆一定可以開開心心的繼續走下去！
為了要慶祝這個特別的日子，我專登做了一個想了很久但又不敢嘗試的蛋糕 ~~~ 芒果慕士棋盤蛋糕！不出我所料，這個蛋糕的難度真是十分高，我分割朱古力蛋糕的部份不夠細緻，故此做出來的格格不夠明顯，唯有寄望下次有機會再做的時候會好一些啦！但好彩我家先生很喜歡芒果慕士，所以都不減他吃這個蛋糕的意欲。

失敗的"免搓"玉桂麵包

早前看了Mabel家做了這個可以免搓的包包很吸引，所以今朝就試焗，可惜效果不是太理想，不知當中是否有些程序做錯了，抑或是我轉了用中筋麵粉的原故，焗出來的包包沒有麵包的質感，反而有點"黏牙"！好彩包包的外表都不錯，可以騙了我家先生拿了兩個作早餐。嘻！希望他不會覺得太難吃啦！
算吧！下次再做過，我想一定會成功的！

焗日本小甜薯

係呢個寒冷的天氣低下，有條熱騰騰的蕃薯食，真係好溫暖呀！

再來一致叫好的 ~~~ 南瓜麵包

前兩日做了這個包包受到一致好評，所以專登再做給奶奶、姑仔及先生的婆婆試，嘻！她們都大讚，令我很開心，但亦增添了少許壓力，因為這個包包的成功，好大原因都是因為南瓜本身，並不是我的手勢突飛猛進呢！>o<

田園麵包

我一向都對歐洲包都有偏好，雖然大多沒有香香的牛油味和雞蛋味，但濃濃的小麥味加上外脆內軟的煙韌口感，則令我不能抗拒！所以好希望在家裡亦可以做好這些麵包，因為我很喜歡家裡的廚房充斥著焗麵包時的香氣的那種感覺，尤其在這微涼的天氣下倍覺溫暖！
經過上次做"拖鞋麵包"完全失敗的打擊後，多少都對這些水份含量極高的麵包的信心不大，只是自己有一股蠻勁，加上四出找尋別人成功的心得，最不可多得的就是Elsa的耐心指導，致令今次這個包包才可以安然誕生！
今次選擇這個包包來挑戰自己，完全是因為我很喜歡吃田園包，每次到Citysuper都會豪擲幾十塊錢去買半個這種包包來吃，滿足了個胃口但郤苦了荷包呢！今次用了CD廚房推薦的Turning Dough Method(TDM)來處理，可能期望越低，相對成功感就越大；這個包包焗緊的時候己經滲著濃濃的小麥味，很香很吸引，本來一心期待著出爐的一刻，怎知一個短短幾分鐘的電話就令到我這個西洋麵包頓時變了我國偉大的人物 ~ 包公 = 黑面 (^o^)！！！
算吧啦！撇開這個焦黑的表面，切開裡面來看，嘩，好開心呀，裡面的組織有著大大小小的氣孔，當然不能與外面的麵包店相題並論，但郤給我打了一枝強心針，下次可以改用Elsa推介的King Arthur All Purpose Flour(上次做Ciabatta時浪費了半包，很心痛)再做，我想一定會更香更好味的呢！

Recipe in Comments

南瓜麵包

終於可以一試用南瓜來做包包的效果，初時麵糰很濕很難搓，真的有點懷疑是否秤錯材料，我便以博一博的心態去加了麵包粉的份量，不知是否每家的南瓜茸的濕度都不同，原食譜的水份份量我只落了一半，但幸好最終都可以做到一個好鬆軟的包包，真是每用一個新食譜都可以學到不同的技巧，所以我都要不繼地嘗試才可有進步的啊！
用南瓜做的包包真的很鬆軟，但南瓜味就不太出，公司裡的同事全都估不到！>_<

Recipe in Comments

哈斯起士麵包

這個麵包體質感鬆軟，並且帶有淡淡的芝士咸味，我自己就比較喜愛咸的包包，所以就再整啦！
其實最重要的就係這個包包很易搓，不用三十分鐘就可以拿去發酵，最適合平日晚上做來作早餐呢！

Recipe in Comments

南瓜蛋白小蛋糕

這個小蛋糕南瓜味不是很突出，反而有點點似蜜糖蛋糕，但蛋糕的顏色橙橙黃黃就很靚，最好就是處理南瓜的程序很簡單，用這個材料做蛋糕感覺健康些，是個不錯的食譜。
這個小蛋糕不知為什麼一出爐就扁扁的，但食落的質感又不是很實，下次又要多加留意先得！

Receipe in Comments

日式芝士蛋糕之練習

昨晚剛剛出爐........

過左八個鐘後：皺皮的範圍縮窄左，周邊都無下陷得很厲害........有進步！

自從上幾次做的日式芝士蛋糕都有皺皮的情況出現之後，我就決心要練好打蛋白和混合麵糊時的技巧........
好開心呀.....今次進步左好多啦，今朝見個蛋糕的收縮面收窄左好多，只是中心部份有，而外圍就沒有，同埋蛋糕的高度都沒什改變，好！我要再努力，但係都要隔幾日才再做喇，因為我家先生就快聞到芝士味都要走了.....^p^

湯種北海道牛奶吐司

看....很軟鬆呢！

這個北海道牛奶吐司我只是用了紐西蘭出產的牛奶做，原本的食譜還用了牛奶香精，因我沒有就無落啦，可能因此就不見得特別有牛奶的香味。但麵包體的質感就很好，所以都可以給我明天一份很不錯的早餐呢！

Recipe in Comments

養生"黑糖蛋白糕"

呢個蛋糕係網友Mabel介紹的，黑糖有養生的功效，而且成份中又只有蛋白。雖然在吃甜點，但仍是覺得比較健康的。
這個蛋糕是用蒸的方法，材料和做法都很簡單，最適合在沒有太多時間而又想吃蛋糕的時候做喇！

Recipe in Comments

日式芝士蛋糕 ~~ 新食譜

我實在很喜歡這款蛋糕，昨晚剛剛在網上又找到另外一個食譜，即刻試試先。其實個做法都係大同小異，不過個份量的比例就同以前做開的不同，個口感同味道真係幾好，個芝士味重d，個質感好鬆軟，好味。
不過今朝起身見到個蛋糕皺左皮，同埋個面仲有好多洞洞添，唔...有d失望！我要再努力練習下我攪麵糊的技巧先得^_^！

Recipe in Comments

"怪樣"湯種花生醬麵包

星期日有多點時間最好就係做一些要預先做功夫的包點喇，所以我就揀左"湯種花生醬麵包"做明天的早餐。湯種就是預先煮好放涼，待我和老公去supermarket補完倉之後回來就搓粉，等待發酵的時候就做了個 poppy seed butter cake，待包包完成整型後就放入雪櫃冷凍至今朝早上再拿出來回溫及最後發酵，那麼便可以有新鮮熱辣的麵包做早餐喇。
昨晚做的包包做型做得很差，原本想跟著書本做一個類似花卷的做型，但試了一個發現很難做，花生醬都唧了出來了；之後第二個我便翻翻書本，想著找一個類似又看來簡單一點的做型，試做了一個，發現做出來的和書本的相差很遠；最後我都是捲起了便算......有點失望，我想都要開始在造型方面下點苦功呢！
今早吃了一個，覺得很鬆軟，我的搓粉技術好像進步了少許，我會再繼續努力既！但是其實最大功勞都是網友Mabel，因為她好詳細的解說隔晚發酵的技巧，真的要謝謝她的分享，我和老公才可一早有新鮮出爐的麵包食啦！

Recipe in Comments

Poppy Seed Butter Cake

剛剛買左焗蛋糕仔用的杯仔，梗係要試下啦.....
我今次揀左Elsa的牛油蛋糕再加埋Poppy Seed落去，簡單又快脆，好快就焗好喇！一出爐就試左一個，好好味呀，俾平時我食開個種牛油蛋糕鬆軟好多，好味呀！

芝士火腿 & 腸仔包

今日唔駛返工，當然把握時間整包包啦！
我今次揀左網友Amigo的“最愛麵團"來做麵包體，這個麵團很易搓，以我這五腳貓功夫，竟然只是用了15分鐘多些便可以搓出薄膜，真的令自己有點難以致信，所以我相信這個會很適合新手用來試做的。這次我分別做了火腿芝士、腸仔及原味三個款呢，當焗完之後，老公都說很鬆軟呀，連我四歲的侄仔都連吃了一個半(他有我家的優良傳統~大食)，我想這個麵包體我都會常做呢，因為滿足感大點o麻！

材料：
高筋麵粉 270g
低筋麵粉 30g
乾酵母 1 1/4 tsp
雞蛋 30g
鮮奶 155 - 160g
砂糖 39g
鹽 1/4 tsp
牛油 30g

1. 除了牛油外，將所有材料搓成粗麵糰，再加入牛油繼續搓揉至光滑不黏手而呈薄膜
2. 滾圓，作第一次發酵至2.5倍大約1小時
3. 取出麵糰，分割滾圓，鬆弛約15至20分鐘，整型包入餡料，放入焗盤作最後發酵至兩倍大
4. 掃上蛋汁，放入己預熱焗爐用175度焗約12至15分鐘即可。

第一次被Tag....

嘻！給Siuvonvon點名玩呢個遊戲，題目係：八個擇偶條件 ~~

呢個 Blog tag 有幾個規則 -
1. 註明你理想伴侶是男或女
2. 寫出你理想伴侶的八個條件
3. 選出8位Blogger一起參與這遊戲，並在對方留言板留言
4. 如被選中的已經完成，可不用再貼文


真係幾難諗.....雖然我仲係青春少艾的時候已經為自己諗左一大堆的"擇偶條件"，其中不外乎"英俊瀟灑、學歷高、身家豐厚....."但係人長大後，發現原來王子公主的愛情故事都會悲劇收場，所以都係理性d好。因為自己都開始擔心自己會成為一個傷心的女主角，有見及此，小妹就重新再訂立一套新的"擇偶條件"喇，講漏一句，呢個係"婚前"的擇偶條件，因為我而家已經再冇"擇偶"的"資格"lu........

1. 我的理想伴侶當然係"男"啦！

2. 我擇偶的八個條件就係：
(1) 個樣要順眼 ~ 唔駛好靚仔，因為靚仔無本心，同埋老左keep唔到我會埋怨o麻！
(2) 要對我屋企人好好，要拍得住我咁 ~因為媽咪佢地對我好重要，如果佢做唔到，咁我一定會扣佢好多分！！
(3) 孝順顧家 ~ 因為我覺得咁至可靠，同埋無咁大機會走我家用
(4) 有主見 ~ 係我唔想做決定的時候幫我決定
(5) 尊重我的意見 ~係我好堅持我的睇法的時候
(6) 要給予我發脾氣的空間(合理的)，仲要無條件咁呵護番我 ~ 發少少的脾氣係女仔的專利o麻
(7) 無論係言語或行為上都一定唔可以對我大聲呼喝、粗魯
(8) 最係一樣亦都係最重要的一樣 ~ 要全心全意咁愛我 (無論係行為上或言語上)

我就係咁，就睇下以下的網友係點 ~~~~

Elsa
Kelly
Mabel
波子
Starryear
Tendy
Kiki
CD

Homemade Blueberry Jam & 提子士干

我其實好少會係出邊買果醬o黎食，因為多數都好甜！但係參考左KiKi的介紹，發覺原來自己整都唔係咁難，加上我發現附近的supermarket係接近關門的時候，好多平時都幾貴的生果都會減價，所以成本唔係咁高就試下啦！
專登再整 scones o黎試味，個味道好好呀，最緊要個甜味可以切合番自己來調較，但係個質感好似乾左少少，下次要留意下，有左今次經驗，下次份量可以整多些囉！

簡單的晚餐

星期六日都唔係屋企食飯，上個星期買落的蔬菜肉食擺左係雪櫃好多日，都係時候一次過清理佢喇！

蕃茄薯仔湯 -
雖然冇落肉，但係落左好多元貝仔，所以好甜、好味！

蠔油雞翼 -
我最鍾意的雞翼同冬菇，所以係我家的"常餐"

蝦皮豆腐 -
先分別將豆腐煎香/蝦皮用乾蔥爆香，再回鑊炒炒，就成為一味幾香口的豆腐菜式喇！
後記：不過因為我今次太懶，沒有將豆腐煎香，所以變成豆腐碎....^_^

蒜蓉炒鮮露荀 -
係supermarket counter的嬸嬸教的，話唔駛落肉，清炒都好味，所以就試下啦。
後記：清清地同爽口，唔錯唔錯！

BBQ後的甜品

白果腐竹蛋花糖水



無花果甘荀雪梨水

材料：
無花果 3粒
甘荀 1斤
天津鴨梨 8個

1. 煲滾大概1.5升水，將己切開的材料煲大概2個半鐘頭即可。


今日約左朋友去燒野食....係約的時候就諗住"秋高氣爽"，最o岩就BBQ架喇，點知今日熱到不得了，直頭變左燒豬，呢個天氣真係好難預計呀！
燒完野食咁熱氣，梗係要食番d糖水同涼茶解一解啦，所以我就煲左........白果腐竹蛋花糖水同埋無花果甘荀雪梨水，兩款一齊飲，希望唔會生暗瘡啦！

豆腐紅豆芝士蛋糕

今日奶奶生日，都係整個感覺健康d的蛋糕送俾佢！

Recipe in Comments

Raisin Scones

今朝返晏少少，所以就可以一早起身做個新鮮熱辣的早餐俾自己同老公食。
話咁快....由磅材料到出爐大概都係用左45分鐘，真係好方便......今次呢個食譜係跟"美味DIY"做，口感幾鬆化，不過我就覺得唔似係出邊食個d咁重牛油味，要諗下先得！

Recipe in Comments

蜂蜜紅豆蛋白蛋糕

早幾日浸多左紅豆，整完個椰汁紅豆糕之後仲剩番好多，所以就參考左網友Mabel的食譜，整左呢個健康又好味的蛋白蛋糕喇！

食後感：同事試過都話好軟綿綿，反而 d紅豆味就唔係咁出，要再諗諗先！

Recipe in Comments

香草蕃茄包包

又係我最鍾意的蕃茄喇，不過今次就係跟左 Starryear 整的，用蕃茄汁代替水份，焗個時真係好香蕃茄味架.....我有兩個仲係包左 d茄汁沙甸魚做餡添，咁做出邊裡邊都咁蕃茄喇......唔....yummy！！
不過我呢幾日因為皮膚敏感，個面出晒粒粒，睇左醫生食緊藥，不過d藥力好勁搞到我腳步浮浮，成日好似飄下飄下咁，所以做呢個包包的麵團搓左成個鐘先搞掂，今朝焗起食落有d乾，可能係over左，唉！都係叫老公出街食早餐算啦！

Recipe in Comments

椰汁紅豆糕

易整又快脆，兼且好耐都無食過，就整黎食下，不過今次落少左椰汁，所以冇咁香椰汁味，下次要襯特價入定d存貨先！

焦糖蘋果蛋糕

因為雪櫃剩番一個蘋果，就試下整呢款蛋糕！
我個人認為可以再煮多些焦糖放上面，咁個面先會靚 d，而個味道就更香更好味......

Recipe in Comments

"香脆"星星麵包 & 香蕉蛋糕

o尋晚搓左麵粉、做左第一次發酵、跟住整型，留待今朝做解涷、最後發酵同焗，因為之前的一個星期早上焗出來的麵包都不是好滿意，故要不斷練習，務求做到滿意為止。今次用了網友Mabel推介的"哈斯起司麵包"做麵包體，學埋佢整的星星圖型，焗左出來真係好得意呀，不過我一心多用，唔記得睇火，到我諗起的時候已經冇得救啦，所以個包包焗"火農"左d，不過好彩都食得，下次都係要專心d先得！！不過總括來說，經過我不繼的向Mabel請教，終於比之前進步左很多，真係要向她講聲多謝！！！

因為今日帶姪仔去我屋企玩，所以就做左呢個香蕉蛋糕俾佢做下午茶點，不過佢好似唔係咁大興趣，淨係食左一件，反而對星星麵包有興趣o的，食左一大個，無所謂啦，只要佢食得開心就得啦！

"哈斯起司麵包" & "Banana Pound Cake" Recipe in Comments

健康"湯種芝麻包包"

雖然心情仍然未完全回復過來，問題仍依舊存在，但人總是要過活的.....
這幾天完全停產，晚餐都是和老公吃杯麵，難得他仍怪開心的可以清掉櫃裡的存貨...(因為早陣子為了抽獎而買了很多)，而我今晚很想為自己打開這個悶局，故選擇了做麵包 (因為我做蛋糕失敗的機會比較大，無謂再令自己的心情跌到谷底)，既可以做明天的早餐及午餐，又可以藉著搓麵團來減壓.......
不過今次不知是否技巧己生疏，還是湯種出了問題，搓了差不多一個鐘才漸見起色，故手臂都有點酸軟，但總算做到，不知麵包的鬆軟度會否不進反退呢.....有點擔心！！

Recipe in Comments

不知怎的.......

呢幾日家中有些成員，之間發生了一些不愉快的事情.....直接影響了我的心情，其實他們並不是第一次，但總不能夠當是平常事看待，心情總是忐忑不安，但又不想影響身邊的摰友，故只有當我習以為常，沒事發生一樣。
可幸的有老公同兩個好好的阿姨在我身邊支持我，尤其是老公，在一些我不想面對的問題上，他都會代我面對......雖然如此，但總是覺得他不太明白我.....他想的不是正正我所想的、我擔心的他總覺不須擔心、總是說著“這個那個你都管不到，倒不如不要想，不要管”但他們始終是我的摯親，怎麼能不管。那我唯有又令他覺得我己經當沒事一樣，避免因我家裡的事而影響到我倆夫妻之間的感情，其實他已盡力，只是無能為力吧了！
現在我心裡就好像被一塊大石壓著似的.......不知怎做亦不想去想怎做、不想去想但又不能不想.....真的希望時間可以過得快一點，因為別人總說“時間可以沖淡一切”那麼就拜託時間去幫我吧！

蕃茄芝士包包(湯種) & 雙色芝士波波

個蕃茄芝士波波好似地殼變動咁爆晒口！

今晚會見到兩個阿姨，佢地話想試下我整既麵包同小食，睇下有冇進步到......所以就揀o左我整左幾次的蕃茄芝士麵包同芝士波波(因為我驚試新野會失敗) ，仲有跟網友Elsa整的蕃茄芝士波波。
麵包我就覺到係做型方面有少少進步，而搓粉方面都快左少少成型，所以我要繼續做多 d，因為真係要靠時常練習才會有進步的！
至於個蕃茄芝士波波就唔係咁理想啦，因為將所有材料混合之後，唔知點解個mixture會好"熙"，根本唔可以用手拎起，我以為磅錯粉的份量，所以就加左兩大匙糯米粉落去，但係焗出來就太乾喇，我諗都要向"高手"請教請教先得！

豐富的晚餐

今日好想食西餐，所以就同老公去 suppermarket到買今晚想食的材料 ~~

頭盤：雜菜沙津

我買左紅綠黃"交通燈"椒、蕃茄仔、溫室青瓜，仲有屋企用剩的小紅蘿蔔。
將所有材料用清手洗淨，再用凍滾水沖洗多次，剩乾水放入沙津碗內，加入由沙津醋、Black Pepper、Olive Oil、Garlic Salt混合成的沙津汁拌勻即可。



餐包：法式麵包
梗係 homemade啦，就係跟網友 elsa整的喇！其實呢個包係未出爐之前，我都好擔心佢會唔會變成"石頭"架！因為係搓粉的時候舊麵團好"鞋"，好似唔夠水咁，我又加左大概20g水，但係又驚唔知會變成點，因為我係用高筋粉加低筋粉個 receipe，應該唔駛加水架。到最後個次發酵，張保鮮紙又痴住個包面，整到個面好醜樣，所以我係個面度學書剪 d花紋，之但係又剪得唔靚...........惟有灑左 d芝麻去遮醜！出爐啦，好心急等佢攤涼切件試下，Elsa的方法真係好得，個面好脆，個包裡都叫軟(可能都算o岩o岩出爐呱 ^p^)，個心終於都定 d！！


主菜 ：牛扒
呢件扒係響 supermarket見到幾靚忍唔住買既，有 d肉赤，因為都幾貴，不過算啦，又唔係成日食。不過就係因為買左件貴扒，所以就唔買現成的牛扒汁，自己番屋企"混下醬"就算喇。最後我就用左蒜蓉、蠔油、生抽同少許黑椒煮成汁料淋上牛扒面就攪掂，味道都幾好呀，下次都可以慳番^v^！！！

法式麵包 Recipe in Comments

中西合璧的早餐

噚晚浸左 d黃豆，今朝一起身就走去整豆漿...........其實自己係屋企整都好方便，又平、又冇防腐劑、甜味又可以自己調較，時時飲又可以養顏兼補充鈣質，好處咁多，點忍得到唔成日飲呢！
加埋噚晚的 Focaccia，就成為今早我同老公的一份“中西合璧 "的早餐喇！

豆漿 Receipe in Comments

Focaccia

終於都食完一連五日的減肥餐喇，磅數似乎冇咩輕到，可能真係要食耐 d先見效，算啦..........當清下腸胃囉！
忍左咁耐，終於都可以整番包包俾自己食，嘻，唔知整邊隻好呢？思前想後，都係整番Focaccia，點解.....因為上次整完，雖然自己都覺得仲有好多要改善的地方，但係都好好食呀，所以都係想整佢，咁樣咪有得食，又可以練習下囉..................
今次用做左一半的份量，同埋屋企原來唔夠低筋粉，所以用左 All Purpose Flour 代替，又學左網友 Elsa 的方法，係預熱同入爐之係的頭幾分鐘灑水，放涼左切開試左一件，個面真係俾上次脆好多，真係多謝 Elsa 的分享。

Five-Day Diet

呢個 menu 日日食的食物都一樣，所以好簡單，好容易整，之但係唔食得澱粉質的食物，所以呢幾日就冇得食我至愛的包包喇，不過唔緊要啦，五日好易過既！

早餐：西柚半個、煙肉兩塊、雞蛋兩隻 (嘻，全部都係我鍾意食既，而且仲可以大條道理食煙肉添)
午餐：西柚半個、雜菜沙律任食(用任何醬汁都可)、肉類任食(任何煮法都可) (不可用生果代替)
晚餐：西柚半個、菜任食(任何煮法及用任何油都可)、肉類任食(同樣任可煮法都可，最好食魚類)

個餐單話最多只可連續食十日，就一定要停兩日食正常餐，效果係十日之後可以輕左十磅(唔計之後反彈)，但係就唔可以食超過一個月，不過我都冇諗住食咁耐，因為我都係覺得均衡的飲食同持久的運動才是最有用的減肥方法，咁點解我要試，因為我貪得意又好似心理上覺得瘦左 d囉！

Banana Pound Cake

今晚返到屋企，一開門就聞到一陣好香的香蕉味，原來有兩隻香蕉己經熟到爛咁滯，所以快快手整左個"light dinner"同老公食完之後就即刻整蛋糕啦。磅完材料之後先記得同事約左我聽日同佢一齊食個一連五日的「減肥餐」(其實唔止五日，不過我唔捨得唔食野咁耐，所以就係咁依啦)，仲要係我負責聽日的食物，所以又即刻將 d蛋糕材料擺埋一邊，走去整左聽日的 lunch先......
終於整好喇，但係已經成九點九，個蛋糕焗完咪成十一點.......咁都冇辦法啦，如果今日唔整，我驚 d香蕉挨唔到聽日喎，所以就整左喇，今次整得好好呀，又香又軟熟，唔，雖然好眼o訓，但係都值得呀.......不過呢個蛋糕就要我老公自己一個食晒 lu，因為我聽日開始就要 On Diet！！！