健康"湯種芝麻包包"

雖然心情仍然未完全回復過來，問題仍依舊存在，但人總是要過活的.....
這幾天完全停產，晚餐都是和老公吃杯麵，難得他仍怪開心的可以清掉櫃裡的存貨...(因為早陣子為了抽獎而買了很多)，而我今晚很想為自己打開這個悶局，故選擇了做麵包 (因為我做蛋糕失敗的機會比較大，無謂再令自己的心情跌到谷底)，既可以做明天的早餐及午餐，又可以藉著搓麵團來減壓.......
不過今次不知是否技巧己生疏，還是湯種出了問題，搓了差不多一個鐘才漸見起色，故手臂都有點酸軟，但總算做到，不知麵包的鬆軟度會否不進反退呢.....有點擔心！！

Recipe in Comments

不知怎的.......

呢幾日家中有些成員，之間發生了一些不愉快的事情.....直接影響了我的心情，其實他們並不是第一次，但總不能夠當是平常事看待，心情總是忐忑不安，但又不想影響身邊的摰友，故只有當我習以為常，沒事發生一樣。
可幸的有老公同兩個好好的阿姨在我身邊支持我，尤其是老公，在一些我不想面對的問題上，他都會代我面對......雖然如此，但總是覺得他不太明白我.....他想的不是正正我所想的、我擔心的他總覺不須擔心、總是說著“這個那個你都管不到，倒不如不要想，不要管”但他們始終是我的摯親，怎麼能不管。那我唯有又令他覺得我己經當沒事一樣，避免因我家裡的事而影響到我倆夫妻之間的感情，其實他已盡力，只是無能為力吧了！
現在我心裡就好像被一塊大石壓著似的.......不知怎做亦不想去想怎做、不想去想但又不能不想.....真的希望時間可以過得快一點，因為別人總說“時間可以沖淡一切”那麼就拜託時間去幫我吧！

蕃茄芝士包包(湯種) & 雙色芝士波波

個蕃茄芝士波波好似地殼變動咁爆晒口！

今晚會見到兩個阿姨，佢地話想試下我整既麵包同小食，睇下有冇進步到......所以就揀o左我整左幾次的蕃茄芝士麵包同芝士波波(因為我驚試新野會失敗) ，仲有跟網友Elsa整的蕃茄芝士波波。
麵包我就覺到係做型方面有少少進步，而搓粉方面都快左少少成型，所以我要繼續做多 d，因為真係要靠時常練習才會有進步的！
至於個蕃茄芝士波波就唔係咁理想啦，因為將所有材料混合之後，唔知點解個mixture會好"熙"，根本唔可以用手拎起，我以為磅錯粉的份量，所以就加左兩大匙糯米粉落去，但係焗出來就太乾喇，我諗都要向"高手"請教請教先得！

豐富的晚餐

今日好想食西餐，所以就同老公去 suppermarket到買今晚想食的材料 ~~

頭盤：雜菜沙津

我買左紅綠黃"交通燈"椒、蕃茄仔、溫室青瓜，仲有屋企用剩的小紅蘿蔔。
將所有材料用清手洗淨，再用凍滾水沖洗多次，剩乾水放入沙津碗內，加入由沙津醋、Black Pepper、Olive Oil、Garlic Salt混合成的沙津汁拌勻即可。



餐包：法式麵包
梗係 homemade啦，就係跟網友 elsa整的喇！其實呢個包係未出爐之前，我都好擔心佢會唔會變成"石頭"架！因為係搓粉的時候舊麵團好"鞋"，好似唔夠水咁，我又加左大概20g水，但係又驚唔知會變成點，因為我係用高筋粉加低筋粉個 receipe，應該唔駛加水架。到最後個次發酵，張保鮮紙又痴住個包面，整到個面好醜樣，所以我係個面度學書剪 d花紋，之但係又剪得唔靚...........惟有灑左 d芝麻去遮醜！出爐啦，好心急等佢攤涼切件試下，Elsa的方法真係好得，個面好脆，個包裡都叫軟(可能都算o岩o岩出爐呱 ^p^)，個心終於都定 d！！


主菜 ：牛扒
呢件扒係響 supermarket見到幾靚忍唔住買既，有 d肉赤，因為都幾貴，不過算啦，又唔係成日食。不過就係因為買左件貴扒，所以就唔買現成的牛扒汁，自己番屋企"混下醬"就算喇。最後我就用左蒜蓉、蠔油、生抽同少許黑椒煮成汁料淋上牛扒面就攪掂，味道都幾好呀，下次都可以慳番^v^！！！

法式麵包 Recipe in Comments

中西合璧的早餐

噚晚浸左 d黃豆，今朝一起身就走去整豆漿...........其實自己係屋企整都好方便，又平、又冇防腐劑、甜味又可以自己調較，時時飲又可以養顏兼補充鈣質，好處咁多，點忍得到唔成日飲呢！
加埋噚晚的 Focaccia，就成為今早我同老公的一份“中西合璧 "的早餐喇！

豆漿 Receipe in Comments

Focaccia

終於都食完一連五日的減肥餐喇，磅數似乎冇咩輕到，可能真係要食耐 d先見效，算啦..........當清下腸胃囉！
忍左咁耐，終於都可以整番包包俾自己食，嘻，唔知整邊隻好呢？思前想後，都係整番Focaccia，點解.....因為上次整完，雖然自己都覺得仲有好多要改善的地方，但係都好好食呀，所以都係想整佢，咁樣咪有得食，又可以練習下囉..................
今次用做左一半的份量，同埋屋企原來唔夠低筋粉，所以用左 All Purpose Flour 代替，又學左網友 Elsa 的方法，係預熱同入爐之係的頭幾分鐘灑水，放涼左切開試左一件，個面真係俾上次脆好多，真係多謝 Elsa 的分享。

Five-Day Diet

呢個 menu 日日食的食物都一樣，所以好簡單，好容易整，之但係唔食得澱粉質的食物，所以呢幾日就冇得食我至愛的包包喇，不過唔緊要啦，五日好易過既！

早餐：西柚半個、煙肉兩塊、雞蛋兩隻 (嘻，全部都係我鍾意食既，而且仲可以大條道理食煙肉添)
午餐：西柚半個、雜菜沙律任食(用任何醬汁都可)、肉類任食(任何煮法都可) (不可用生果代替)
晚餐：西柚半個、菜任食(任何煮法及用任何油都可)、肉類任食(同樣任可煮法都可，最好食魚類)

個餐單話最多只可連續食十日，就一定要停兩日食正常餐，效果係十日之後可以輕左十磅(唔計之後反彈)，但係就唔可以食超過一個月，不過我都冇諗住食咁耐，因為我都係覺得均衡的飲食同持久的運動才是最有用的減肥方法，咁點解我要試，因為我貪得意又好似心理上覺得瘦左 d囉！

Banana Pound Cake

今晚返到屋企，一開門就聞到一陣好香的香蕉味，原來有兩隻香蕉己經熟到爛咁滯，所以快快手整左個"light dinner"同老公食完之後就即刻整蛋糕啦。磅完材料之後先記得同事約左我聽日同佢一齊食個一連五日的「減肥餐」(其實唔止五日，不過我唔捨得唔食野咁耐，所以就係咁依啦)，仲要係我負責聽日的食物，所以又即刻將 d蛋糕材料擺埋一邊，走去整左聽日的 lunch先......
終於整好喇，但係已經成九點九，個蛋糕焗完咪成十一點.......咁都冇辦法啦，如果今日唔整，我驚 d香蕉挨唔到聽日喎，所以就整左喇，今次整得好好呀，又香又軟熟，唔，雖然好眼o訓，但係都值得呀.......不過呢個蛋糕就要我老公自己一個食晒 lu，因為我聽日開始就要 On Diet！！！

是日晚餐

今晚的晚餐就係要清左雪櫃裡的剩餘物資 ~
1. 噚日整左的 "Focaccia"
2. 雜菜湯
3. 用剩了的瑞士汁整成的"香草瑞士雞翼"
4. 蒜蓉芝士焗青口

"蒜蓉芝士焗青口"Recipe in Comments

義大利傳統麵包 ~ Focaccia

Focaccia其實係意大利其中一種傳統的麵包，由我第一次見到呢個 receipe 的時候，已經很想整黎試下，因為我一向對歐洲式的麵包都情有獨鍾。因為如果自己都整到，咁就可以唔使成日去買貴包，可以慳番少少o麻！
焗完出來，攤涼左少少就忍唔住切左一件黎試喇............唔，好味呀，不過梗唔夠出去餐廳食咁好啦，因為我 d手勢未到家o麻，不過唔緊要啦，努力 d整多幾次，我諗會有進步既，嘻！呢個就係我成日俾自己的藉口喇！！！

Recipe in Comments

醜樣的Blueberry Yogurt Muffin

Muffin 好似被風吹向一邊咁...............


係咪好似痴左一個藍芽 headphone咁呢！

我都唔知係咪同 d muffin無緣咁，次次整親都唔似樣，個頂唔識爆開不特止，焗焗下仲突然係個頂度開左個口爆 d蛋漿出來，攪到個樣唔知似咩............唉，唔通我連個muffin呢樣好似冇咩難度既糕點都整唔好，唔，好少少傷心呀！！！

香蒜蝦皮蒸茄子

今個星期我都要係屋企煮飯呀，因為老公岩岩出院，都係留係屋企食健康 d。
呢個菜其實好簡單，只是將茄子隔水蒸熟，然後加入調味料，再淋上預先用蒜蓉炒香的蝦仔。但是味道香口得來又不肥膩，因為茄子如果用炒的方法，就會需要用大量的油，所以相對地比較肥，故此有食譜教做"魚香茄子"時都先將茄子蒸熟才加入其他材料。

湯種"蕃茄乾芝士包"

因為聽日要陪老公入院做個中型手術，明知會好唔得閒，所以專登整定個麵包，等我聽日帶住周圍行。咁我就用左我至愛的蕃茄乾同芝士整左呢個包包，不過今次就用左《65度湯種麵包》一書裡的"意式香草麵包"改左裡面的餡而做的，焗出來的效果真係好軟熟呀，可能係湯種的關係啦，唔，有呢個包包陪我，實唔會餓親啦！

Recipe in Comments

迷你日式芝士蛋糕

今日同左我侄仔去完學畫畫，跟住就帶佢返我屋企玩，見有時間就好快咁整左呢個迷你日式芝蛋糕俾佢做下午茶，我今次用左 muffin盤整，不過係脫模的時候就心急左 d，令到個邊醜樣左少少。但係另外一方面，唔知係我的技術有所改善呀，定係個模的關係，今次冇下陷喎，等我下次用番大的糕盤再試下先！

咖啡二重奏

樣子怪怪的湯種咖啡包包


咖啡雙色饅頭

上 個星期己經諗住要做呢個咖啡包包，但係因唔夠時間的關係擱置左，咁今日難得咁早返到屋企，梗係拿拿聲扲 d 材料出來磅啦，因為我有兩本麵包書都有教整呢款包，咁用邊個 receipe好呢？後來都係用左湯種o個個，因為諗住有時間同埋見到 d網友都好鍾意整，話會軟熟 d喎，咁就試下啦.............整呀整，我既搓粉技術都係未合格，要搓成四十五分鐘先有薄膜形成，跟住發酵、整型、再發酵、跟住入埋爐都成十 點幾，唉，仲諗住今晚十點半之前就可以o訓覺添！終於出爐喇，個樣有 d怪怪地，都整唔到好似本書咁添.........但係好香咖啡味喎，咁就即刻試一個，嘩.....好苦呀，下次我諗要減一半咖啡粉先得，不過唔緊要，唔 試點知個 receipe o岩唔o岩自己呢！

而個咖啡雙色饅頭就係趁麵包發酵的時候整的，亦都係我今晚的晚餐，相比起個包包，味道就o岩o岩好喇，可能之前整過有經驗，所以一口氣食左三個咁多，唔.......好滿足呀！！！

Coffee Bread Recipe in Comments

焗藍莓芝士蛋糕

(今次脫膜的時候心急左少少，攪到 d 餅碎痴左落個蛋糕邊添)

呢個蛋糕係送俾我一個好尊敬的上司o既，佢由我一入呢間公司開始己經好照顧我，無論是工作上或是做人處事上，佢都好用心咁教懂我好多東西，對於我來講，能遇到這一位上司真是我的福氣，多謝的說話永遠都說不完，只好趁著生日送給他這個小小的心意，希望佢鍾意啦！
今次係我第一次用呢個receipe整的，因為他是比較喜歡較濃味的甜品，所以這款應該合他心意的，但係個面就?左少少，我諗係控制火候方面仲要有待改善，唯有寄望下次啦！

Receipe in Comments

Tonight Dinner & Tomorrow Breakfast

豉油王肉絲炒麵


豆沙鍋餅


吞拿魚麥包 & 芝士磨菇麥包

今日放工後就去左上海街逛逛，掙扎左一陣先買了幾個細細的 mousse 圈(真係好慳)，順道去埋材料舖度補倉，去到見到咩都想買，又覺得買左就可以試整喇，咁咪出事囉！！一出材料舖就落好大好大的大雨，我仲抽到一袋二袋，因為一開始就買左個成十吋的蛋糕盒，真係好狼狽，咁咪唯有用極速的步伐行去小巴站快快返屋企。返到屋企己經成四點幾，仲諗住整麵包同埋蛋糕明早去造節個時俾我老公的婆婆試下，搓完個麥包等發酵的時候先記起今晚唔知食咩好，係咁有限的時間裹面，梗係整 d快餐啦，就係"肉絲炒麵"加埋"豆沙鍋餅"做甜品，咁有可以快 d整埋我個麵包喇，真好！！不過好耐冇整過呢個豆沙鍋餅，真係有 d 生手，個皮煎得太厚之餘，豆沙餡又包得太多......好彩，老公都照單全收，不過真係要時不時練習下至得。至於個蛋糕，梗係整唔切啦，唯有等下次啦.........
仲有個麵包呀，今次係第一次整麥包，唔知點解硬係覺得好難搓咁，搓左差不多四十分鐘都好似形成唔到薄膜咁，唯有再埋頭苦"搓"啦，跟住到包餡的時候，又貪心得滯包得太多餡，攪到焗的時候有一個包漏左少少芝士餡出來，真係陰公呀，記住下次唔好咁貪心先得 ^-^

Receipe in Comments

焗爐退休了^p^

呢個焗爐己經陪伴了我大概都有七八個年頭了，但係常用的只是呢一兩年；以前多數都係屋企開 Party，要整好多野食，又或者睇到報紙雜誌介紹 d 用焗爐整的食物至會專登搬佢出來用，再唔係就好懶唔想開煮食爐的時候就用佢o黎焗雞翼、豬扒、薯仔、雜菜.....至於甜品就只有焦糖燉蛋一樣係叫做常整既(因為我一個己退休的上司教我而我又整到的)，然後又抹得乾乾淨淨咁放番落廚櫃入面。

有朋友問我點解以前一路都有焗爐又唔見你整蛋糕麵包，而家又成日整既呢？呢個問題真係要諗番買個焗爐的時候喇，當時因為剛剛搬出來住，而我又鐘意整野食，咪 即刻買左呢個焗爐，諗住整下蛋糕麵包咁，但係有一次，亦即係第一次，一心諗住焗個最 basic 的牛油蛋糕俾個好朋友幫佢慶祝生日，點知出來硬到好似石頭咁，最重要係成班朋友係我屋企見住呢個蛋糕的誕生，嘩............當時真係好唔開心，個蛋糕仲要俾人改左個花名~"勞工皂"，嗚嗚嗚........之後都有再試整多次但都係失敗，故此就再冇焗蛋 糕喇！跟住這幾年，當中雖然有買到好多烹飪書，但係都鼓不起勇氣再試，直至上年有一次公司活動，勾起了我做蛋糕的憧憬，所以就的起心肝清理好廚房的一角用來安置這個時時都在黑暗的廚櫃裡的焗爐，等佢可以重見天日。在這年幾兩年的時間裡，我倆並肩而行，一起經歷成功和失敗，對於我來講，佢就好似朋友一樣，我要用多一點時間、多一點耐心，去適應同了解佢的性能，到了現在，我要換一個新焗爐，並不是覺得它有太多缺點，而只是我比較貪心了一點，希望有一個容量比較大，火力比較平均的而己，雖然是這樣，我都是要多謝"它"，有佢在我身邊，我才會重新發現到弄糕點的樂趣！！！

縱使這個焗爐在我家己經退役，但我並不是要將它送到堆填區裡去，而是將它交到一些有心人手上，讓他們好像我一樣，可以慢慢培養出弄食的興趣來，那麼，焗爐就不需要浪費了它的本事啦，而我亦都好希望它將來既主人可以好好利用它！

雖然它只是一個焗爐，但是畢竟和我同屋相處了一段頗長的日子，心裡真是有點依依不捨，唯有大聲說聲..............再見了，焗爐！

咖啡雪芳蛋糕

買 左幾日麵包，發覺都係時候要自己整早餐俾自己。本來一心諗住整我最愛的包包， 但係今日返到屋企己經八點半，如果以我的速度，肯定兩點都唔駛休息啦，所以就唯有整蛋糕。咁點解要整咖啡蛋糕，因為本來諗住跟 cookbook 整咖啡麵包，所以個心就要整一個 coffee 味的食物..........呢個係跟網友整既，本來期望都唔高，因為我的做蛋糕技術都係麻麻，但係結果就出乎意料之外~~~超鬆軟呀，我諗呢個係我有焗蛋糕以來整得最好的，可能係個 receipe 教得好啦！好開心呀，所以一切開老公同我就食左 1/3 啦，希望我可以 keep住就好啦！！！

Receipe in Comments

Happy Birthday to My Husband ^u^

今日係老公生日，所以一早起身整個蛋糕送俾佢，整咩好.......梗係佢最鍾意的"栗子蛋糕"啦。
今朝整個海綿蛋糕整得唔夠鬆軟、切片又切得唔夠平均、廚房個氣溫又太熱，令到 d 栗子忌廉同 d 唧花忌廉好似溶溶地咁、圍邊忌廉，鋪杏仁粒同唧花技術又唔好，總括而言，真係要努力努力咁改善下。不過好彩，我 husband都仍然話好味.........hi..........因為係我整嗎，佢點敢話唔好食呢！！！

Receipe in Comments

上堂整既包包

為左要令自己整麵包的技術得以改善，所以今日跟左 d 貓友去學整包包，因為今次係我第二次上堂，所以一早己經準備左要問 Miss 的問題，希望返到屋企自己都可以整番咁鬆軟。
不過其實上下堂真係好好架，因為 Miss 一睇就知我錯係邊，可以警惕住自己留意多 d，唔駛番到屋企又做錯同一樣步驟。今次上堂係學整"提子方飽、吞拿魚包 & 腸仔包"，因為我自少都唔鍾意食係包包或者蛋糕?面的提子乾(但係就咁食就鍾意)，所以整方飽的時候，Miss叫我地落兩湯匙的提子乾，但係我就剩係數住十粒黎落，諗番都幾攪笑...............^p^

芒果慕士蛋糕

雖然呢個蛋糕並唔係第一次整，但係因為今次係為左個朋友既仔仔一歲生日而整既，當然想整得好味 d，靚 d；但係去 suppermark又買唔到靚的芒果，唯有用罐頭桃做裝飾啦....唔，今朝影呢張相的時候都覺得幾滿意，但係可能天氣太熱，老公拎到返公司己經溶溶地，個邊仲"塔"左落黎添，嘩.......真係好傷心，老公唯有買條膠邊頂住同雪落 freezer，希望令到個蛋糕挺番 d啦.......我諗我都唔會係夏天再整 mousse cake出街 lu...............

香草芝士包

呢排真係好忙呀，連整麵包的時間都冇，所以今日一有時間就整左啦.....唔，去上過一次堂真係唔同 d，因為終於知道麵團要搓到怎樣才算得；今次呢個包焗緊的時候全屋都充滿香草同芝士的香味，一出爐己經急不及待食左一個 ^~^，口感真係好左 d，老公都話有進步呀，真係開心.........我要~~~努力、加油呀.......

麻麻地Perfect 的Party ^_^

今日老公約左佢的表弟表妹來我地屋企開party，梗係唔少得整一大堆野食呢part啦。對於我，本來係一個好好的練習機會，但係好景不常，前日開始有少少作感冒，我己經定時定候食感冒藥，諗住冇事啦，點知又適逢公司勁多野做，係身心都疲勞的情況底下，今日真係唔係好掂，兩邊鼻子都塞左，又出唔到聲，平日狀態好的時候，整野食都叫還可以............但係今日咁的情況都預左麻麻，本來預左整兩個蛋糕，但係今日都淨係整左 Japanese Cheese Cake，仲要係咁多次以來最差的一次，點解.....個蛋糕面好似地震咁爆開曬，好彩味道都叫 ok。
本來又諗住整芝士波波，貪佢易整又快脆，點知去到尾聲先記得原來冇整到；本來鹹食方面都唔會太差，但係結果都係一樣，連焗雞扒同薯仔都焗極都唔熟、個煙肉露荀卷 d汁又較得太鹹.........唉，所以真係冇咩心機，好彩都仲有一班就算幾難食都會話好食同埋幫你食曬的一班好表弟妹.....唔，真係要多謝佢地，希望下次唔會令佢地失望啦...........^_^
不過好彩有奶奶整的咖喱魚蛋豬皮同埋豬扒，姑仔整的沙津都好好味，可以用來頂檔，咁先唔會咁慘咋........

焗藍莓芝士蛋糕

好耐都冇去學整蛋糕，踫巧今個月去呢間 cake school學整cake有優惠，而我又想試整焗的 blueberry cheese cake 好耐，所以就整左呢個蛋糕喇.....唔，我就覺得焗的好味d呀，因為之前整開涷餅，成日都覺得d芝士味唔夠，但係焗既呢就感覺好重，好實在咁，正正滿足到我呢個芝士怪的口味，嘻.....我要整多幾次練習下先....

第一個送出的"生日蛋糕"

呢個係我第一次親手做來送給別人的生日蛋糕，這個幸運兒是誰？......ding ding ding ding....就是我最喜愛的人....之一 ~~~ 我的姪仔！佢今年已經四歲啦，雖然有時真的很頑皮，總把爺爺奶奶氣壞，但有時又會把你弄得很歡喜；有他在家的時候，小嘴不停的說話，一對小腳像是上足了電一樣，不停的四圍穿插，總是把氣氛鬧得熱烘烘的，那時總想他稍為休息一下，不要把我這些"老人家"弄得"身心疲累"；但若果他不在家的時候，又會覺得有點兒冷清，總欠缺一點點似的。若果給我選擇，我都是希望跟他玩玩捉迷藏，教他讀讀字，說說傻話，那是一種不能言喻的歡樂！
本來想用朱古力做一個蛋糕給他，蛋糕面鋪滿朱古力熊仔餅，期待著他看到的時候，一定"嘩"的一聲.....但我又忍不住向他吐露了這個"機密"，本以為他會很期待，但他一聽之後，"HAA"一聲...."姑姑，我不喜歡吃朱古力蛋糕啊，我想食芝士蛋糕...."那麼，我就只好做了這一個"日式芝士蛋糕"給他作生日蛋糕吧，希望他收到的時候真的會很開心啦.....因我最喜歡看到他歡喜若狂的樣子的....

Dried Tomato & Chedder Cheese Bread ~ 3rd TRY

呢個飽己經係第三次整喇(亦都係我的麵包生涯的全部)，有朋友問我點解唔試下第二隻飽，其實我係好鍾意食麵飽，所以每一種飽我都想整，但是我亦係一個都幾執著的人，我要每一樣事都令到自己覺得 ok先會做第二樣，就好似"蜂蜜蛋糕"咁(所以 d屋企人就快聞到蜜糖味都怕)。
不過努力係唔會白費的，今次真係幾滿意，除了搓粉同造型技巧仍需磨練，色水及鬆軟度都比上次做得好好多，今次我仲轉用片裝的 chedder cheese 添(因為做緊特價)，效果都好好味呀......嘻，我諗下個星期可以試第二隻飽啦........

雙色饅頭 & 醜樣"蜂蜜蛋糕"

~雙色饅頭~

~ 醜樣"蜂蜜蛋糕"~

一大清早自動自覺的起床，準備展開一個預料會好充實的星期天.........
等 o左一個星期，終於可以試試一位網友新 post 出來的"蜂蜜蛋糕"，其實呢款蛋糕都整過三四次，但係呢個 receipe係唔同我之前整個d既，最緊要我係好鍾意食，所以就心思思想整喇。點知.......可能係個份量太多，又或者個爐既面火太勁，開始的時候升得好靚，但係過o左一陣，竟然有 d蛋漿響個蛋糕面"傾盆而出"，我己經即刻較細個火，又用毛巾抹緊 d蛋漿，但係都攪到個焗爐污污漕漕....最重要的係，個蛋糕焗完之後個面?曬不特至仲有個火山口添，個邊同個底都脆脆地，而糕底又有一層沉澱左，但係成功個部份就好好味，即是證明若果成功的話係會好好味(唔知幾時至成功呢)。
雖然經過左呢個沉重的打擊，但係我仍然嘗試第二個新作 - 雙色饅頭，因為我老公好鍾意買d現成的返屋企"叮"來食，所以我決心要整俾佢試下，等佢唔駛買嗎.....嘻，個製成品都唔錯呀，但我略嫌唔夠顏色同埋唔夠甜(手多多減左)，下次我諗會好 d啦。
依家都總算有番 d 安慰，好，下個星期再挑戰呢個"蜂蜜蛋糕".......

.

"雙色饅頭" Recipe in comments

Pizza

剛剛個 muffins先出爐，又要預備今晚的 dinner 喇!呢個 pizza 睇落唔難整，但係其實又唔係話咁易喎.....點解，可能我的搓粉技術仍有待改善啦....
至於味道....梗係好味啦，因為 d 餡全部都係我鍾意食既，有火腿、菠蘿、蟹柳、粟米同蘑菇，但係可能太貪心的關係，個 pizza面好似座山咁高，要用匙先食到呀...同埋初初灑芝士的時候好似好多，但係焗左出來原來唔夠，下次可以放心落多 d 喇.....

藍草莓鬆餅

呢兩次整既野食都係之前失敗過既，因為我想專心整好一樣先再學整第二樣!!! 經過上次失敗的經驗，今次呢個 muffins 好好多啦.....個樣靚仔好多，個味道都唔錯。不過唔知點解個頂唔爆開既呢?

Cheese Ball Ball

今日見到 supermarket 芝士粉做特價再有九折，即刻諗起要再試整芝士波波，所以一口氣買o左六枝咁多，我諗整咁多次，實整到啦呱，嘻.....今次真係唔同呀，口感好過上次好多，但都係略嫌唔夠煙韌，下次可以再落多少少奶。但係第二日d同事試過都覺得 ok，hi.....真係幾開心架.....

Blueberry Muffins

食過晚飯後，好似好得閒咁，就同姑仔整左呢個上個星期失敗的 muffin(唔知點解失敗)，唔.....今次都算 ok 啦，不過都唔係太好，個心唔夠乾身，我地兩個研究o左，可能我個爐的底火唔夠，下次可以試下較低 d 火焗耐少少時間，睇下會唔會好 d。同埋今次我將原本的食譜減半，但係可能個模的尺寸大，所以倒落去的蛋糊裝唔滿，焗出來唔夠高，唔夠靚仔。大家有冇留意我呢個明明係"藍莓"muffin，點解唔係藍色既，因為藍莓加o左落 d 蛋糊到，就係"黃+藍" 變 "綠"啦(我估咋).....所以我地仲以為唔小心加o左綠茶粉添.....hi hi......
唔.....我覺得自己今日好充實呀，由起身開始熨衫、晾衫、吸塵、執拾屋企到依家整埋蛋糕，嘩...仲忙過返工呀，之不過就好開心，因為有個整齊乾淨的家，加上香噴噴的食物，唔....好幸福咁呀，不過唔知會唔會不知不覺咁肥o左呢，我諗聽日開始要加倍做運動啦.....

"脆脆"芝士波波

又有新作品啦......芝士波波，點解要用"脆脆"來形容呢!因為整既時候先發覺無芝士粉，咁咪自作聰明咁用卡夫芝士片座溶來代替囉，點知同粉攪勻之後，加左少少奶已經好濕，以為 ok 所以就去焗，焗緊的時候可能太乾的關係，已經爆左d芝士餡出來，依家食落就有少少似 cookies 咁啦(要煙煙韌韌先似出街買o個 d架嘛)....所以呢，對於我呢個初學者來講，都係跟足食譜好。

Recipe in comments