牛扒鮮菇天使麵

又是將雪櫃內的已有的材料煮成一碟!!!

Focaccia

好耐好耐...耐到打麵糰用幾多度都要打電話問功課。回想起以前隔日就要整包，一日三餐要食包都要整，未食晒又要整，依家呢個動力去左邊呢？

今日係屋企坐係度都坐左半日先諗起今日的節目係要整麵包，咁時間無多動力又未回復，就整呢個我初期非常喜歡整的一款包。

一人晚餐....Risotto

今晚又有一人晚餐的機會，很簡單，先生要外出吃飯，剩下自己一點都不悶，一早己經想好要試煮這個先生不愛吃的Risotto！


意大利燴飯是用一隻煎pan由頭煮到落尾的菜式，由生米煮成熟飯，街外吃的很多都會是米心有點硬，有嚼勁的，但真心我是點怕吃這種有點兒生的感覺，在家，便可以隨自己喜歡煮成自己的味道。Risotto是意大利飯燴飯，用的當然最好是意大利米，但我沒有買到意大利米，亦應該不會買(因為先生都不喜歡吃，我沒可能自己吃完一包米啊！)，所以用左家裡食開的日本珍珠米。


雖然計劃要煮這個燴飯已有好幾日，但係材料方面就盡量以"清雪櫃"為大前題，因為到了星期日多多少少都會為新一個星期入貨呢！今天用上的是南瓜、啡蘑菇、辣肉腸、煙肉、洋蔥，每樣少許，加埋就很大啦！


去阿銀度偷師 ~~

1. 用少許橄欖油煎香煙肉和辣肉腸至金黃出油，盛起
2. 落洋蔥、南瓜炒至軟身，再加入蘑菇炒至軟加入米炒勻，落白酒至蒸發，加入雞湯，因為我沒有經驗，所以是逐少一邊煮一邊加，煮約25mins至米熟至剩下中心有點生
3. 倒回煙肉和肉腸，用鹽和黑胡椒調味，倒少許忌廉和牛油拌勻蓋上蓋，然後熄火焗約8mins，出來米是剛剛全熟的，食得。

香煎三文魚伴蕃茄牛肉燴飯

噚晚朋友來炆了蕃茄牛肋條吃剩了少許，本來諗住煮個意粉撈埋個汁咁就一餐！不過發現原來雪櫃仲有早兩日留低的一大碗飯，足夠我地兩口子食，咁不如煮燴飯，煎件三文魚柳係飯面，快脆有得食可以早D瞓覺啊...(好眼睏！！)


材料：
吃剩的蕃茄牛肋條肉
冷飯一大碗
三文魚柳
洋蔥半個切粒

三文魚係跟 阿銀方法 煎的, 真是皮脆肉滑呀！



做法：
1.  三文魚用少許鹽，black pepper，紅椒粉稍醃
2.  用中小火預熱鑄鐵鍋，放少許olive oil炒香洋蔥粒至軟
3.  倒入牛肋條肉，用匙將肉稍為壓碎，加入適量鹽、辣椒粉調味，加入少量清水煮至微微滾起，加入冷飯和材料拌勻一會，蓋上蓋，熄火焗一會
4.  焗飯時，用中小火預熱煎pan，放少許olive oil，三文魚柳臨落鑊時拍上少許粟粉落魚皮上
5.  魚皮那邊先煎約3 - 4 mins至皮脆，番面後熄火用油餘温煎魚，若肉厚要約4mins，肉薄則2 - 3 mins即可
6.  煎魚時可以將飯放上碟中，魚煎好就鋪面，那就兩樣都可以熱的上碟啦！

皮蛋肉鬆豆腐

朋友仔又來我屋企玩，今次話要食東南亞菜式，所以無牛扒羊架食！呢個餸係好容易，容易到係人都識，不過唔知點解去外邊食會貴咁多，所以係外邊我會點好難好麻煩的菜，因為知道自己會嫌麻煩唔會整，咁出去食就可以理所當然啦！

我有個朋友好鍾意食芫茜，鍾意到要我將買來的芫茜全部放晒上面，好嚇佈，根本她是食芫茜，唔係食皮蛋肉鬆豆腐 =.=


材料：
蒸豆腐 ........ 一磚
皮蛋 ............ 2隻
肉鬆 ........... 適量
芫茜 ........... 先用清水浸泡一會，待沙泥全沉底才用水清洗，我習慣只用近葉的一小段，其餘都不要


醬汁：

蠔油、糖、麻油、醋適量


做法：
1. 先將豆腐切粒排在碟上用大火蒸約3mins至熟，取出放至稍涼瀝乾碟中的水
2. 皮蛋剝殼用飲用的水稍為沖淨，抺乾切粒粒鋪在豆腐粒面
3. 皮蛋粒鋪上肉鬆
4. 醬汁材料拌勻試味，淋在肉鬆豆腐之上，鋪埋芫茜即可。

波蛋鮮果沙津

星期六朝早先生都會去打波，我都會好有心機咁整早餐俾自己享用，因為唔駛顧住先生的口味，自己鍾意食咩都可以，就算亂咁整都得！

噚晚由媽咪屋企攞左唔少生果，每樣都拎少少，咁就不如食生果餐健康d啦！之但係好鍾意食蛋，係鍾意到整咩食都諗可唔可以加隻蛋落去。所以我諗到整沙津，因為可以烚隻蛋落去整，但係煲緊水的時候又諗到若果烚隻蛋跟住又要剝殼又要切粒，我又肚餓喎，咁不如把心一橫整poach egg啦，我切晒d生果粒粒撈埋沙津醬，隻蛋啱啱好，鋪面就攪掂食得！生果沙津整隻波蛋好似有d怪之不過自己食無所謂，最緊要食得開心！！

照燒雞脾

昨晚意粉煮多了又剩，今天就吃雞脾意粉罷！

很喜歡吃雞，每次入到超級市場都會行去擺雞的雪櫃，今次雞脾做特價，所以買左幾盒放上冰箱以備不時之需。雞脾是返工出門前由冰箱取出放在下格解涷的，放工返到屋企取出用廚紙吸乾水，用適量的調味料醃下，我用左 ~~

薑汁、少少鹽、black pepper、chili powder、糖、酒、老抽醃約半小時

1.  用中火燒熱個煎pan，用筷子刮去雞脾上的薑蓉，落鑊用中小火煎至兩面雞皮金黃，用筷子拮入已熟約15mins

2.  將餘下的調味料加入照燒汁拌勻，倒上雞脾面，蓋上鑊蓋焗煮一陣至汁濃稠即可。

菠菜忌廉長通粉

近排影的相都唔夠光，唔知係部相機的問題定係盞燈的問題，跟住又腦閉塞咁成日唔記得off左個日期mode，影食物相有個日期好怪，但係每次都係食完洗完碗，好得閒咁走去upload張相的時候先發現到，結果係...無辦法！

早幾日煮左個幾道菜的晚餐之後，必然會留下每樣少少的材料在雪櫃裡，所以之後的晚餐多數會用來作清理食材，我就最鍾意煮意粉，一人一碟煮同洗都好方便！


材料有 ~
煙肉 ..... 切小片
露荀 ..... 切小段
洋蔥 ..... 半個切條
蘑菇 ..... 切件


~ 露荀放入滾水中灼約1min撈出瀝乾水

~ 用慢火煎香煙肉，放入洋蔥炒至軟身，加入蘑菇同樣炒至軟身
~ 加入鹽和pepper調味
~ 同一時間煲水煮長通粉
~ 將煮好的通粉瀝乾水直接倒入其他材料的鑊中炒勻
~ 加入適量的忌廉拌勻直至有少許滾起，熄火加入芝士碎和喜歡的香草趁熱拌勻即可。

牛柳條配照燒蘑菇汁

用牛肉做Main course 數是走不了的，因為我倆都是牛魔王，大多是預先買定，都是放在freezer裡的存貨，因為同事都喜歡訂一些涷肉，所以我都跟著訂了些牛柳條呀、牛扒呀、牛肉粒呀、肥牛呀.....等等。今天沒有專登吃牛扒就用了這些牛柳條也不錯啊！

牛肉只需預早解涷就可以，又唔駛醃，要思考的就只有配搭的醬汁，雪櫃裡有一盒未開的蘑菇，就整蘑菇汁啦！

~ 牛柳條解涷後用廚紙吸乾水，到煎的時候才灑少許鹽和pepper
~ 煎pan用中火預熱，落少許油，用中火兩面煎香牛扒至自己喜愛的生熟度
~ 煎好牛扒，盛起放在大碗中保暖和讓牛扒休息一會
~ 用煎牛扒的鑊用慢火煮溶少許牛油，加入蘑菇炒一下，再加入少許蒜蓉拌勻抄香
~ 炒蘑菇至軟身，加入自製的照燒汁煮至濃稠
~ 牛扒排碟，淋上蘑菇汁即可

忌廉焗蠔

兩款海鮮一起上可以慳了不少時間，家中的薯仔只剩下一個，所以焗杯裝不滿，焗出來便不夠飽滿不好看！我的蠔也是frozen的，很方便，想吃便隨時拿出來解涷便可，很適合我這些懶得出門的主婦！


份量可做兩小焗杯 ~

生蠔 .......... 4隻(我的蠔size很大)
煙肉 .......... 2片
洋蔥 .......... 1/4個
蘑菇 .......... 適量
薯仔 .......... 1個


1.  將蠔放入滾水中燙至稍為收縮，用涷水沖至蠔身變涷，用廚紙印乾水
2.  薯仔切粒放入煲中用剛蓋過薯仔面的水煲至軟身即可瀝乾水
3.  煙肉切細粒用少許油慢火煎香，加入洋蔥及蘑菇炒至材料軟身
4.  加入少許鹽、胡椒粉調味
5.  倒入適量的忌廉(花奶或牛奶也可)煮至起泡熄火
6.  加入已煮諗的薯仔炒勻
7.  焗杯底放上一層薯仔忌廉，灑一層芝士碎，放入生蠔，再放一層薯仔忌廉，面再灑大量芝士碎
8.  用200度焗15mins至面轉金黃色即可

煎帶子配菠菜忌廉汁

今年先生的生日晚餐決定在家裡食，菜式當然不可馬虎又不能太複雜，因為自己也想舒舒服服的和先生一起用餐嘛！煎帶子是每次出街食飯都好鍾意點的一道菜，因為外脆內軟剛剛熟的質感實在太好吃啦，見雪櫃存貨有帶子刺身，今天就試做一下啦！

煎帶子真是一門好考功夫的菜式，要做到外脆肉軟，真係一點都唔簡單，因為我今次就真是煎得有點過了頭啦！若果每天都可以煎兩粒來練習下就好啦....發夢中！


菠菜忌廉汁是用了冷藏的菠菜蓉，解涷後用少許蒜蓉炒香至軟再倒入忌廉煮起泡，落鹽和胡椒粉做調味便可！

桑寄生蛋茶

執拾廚櫃時找到了一盒完整未開封的桑寄生葉，原來買了好耐好耐..耐到自己完全忘記，今天有時間而且也不需多費時就可以煲了一煲美味的飯後甜品呢！

很久沒煲過所以參考了 Miss Julie 的方法 ~~

桑寄生葉大概一飯碗
水一公斤
蛋隻數隨意
最好加入蓮子
片糖約兩片

1. 水煲滾後落已稍為沖洗的桑寄生葉
2. 滾起轉中小火加入雞蛋煲約40mins
3. 將茶葉及雞蛋隔起
4. 雞蛋剝殼後放回煲內加入片糖再用中小火煲約10 - 15mins即可。

烤南瓜

很愛南瓜，由不知何時開始愛的！

總記得小時候媽媽煮南瓜時，我們都不愛吃，無論媽媽說著南瓜含有甚麼多的營養時，我們都堅持不愛吃！但不知由何時開始....會叫媽媽買南瓜煮南瓜，吃著時會想著南瓜的很多營養，現在會叫姪兒吃南瓜，就像媽媽那時叫我們一樣......莫非我已經老了！

~~~~~~~~~~~~~~~~~~~~~~~~~~~~~~~~~~~~~~~~~

因為鍾意食，所以南瓜在我家的用途非常多。吃西餐時作伴菜、做沙津、中式時用來蒸排骨，中式西式的南瓜湯，總之家裡一定有個南瓜，無論是不是萬聖節....嘻！


今天用烤的方法是為配合西式的早餐多士，我喜歡先將南瓜切件稍為蒸一會兒約3mins，才排在焗盤放入焗爐用200度兩面烤至金黃色。

普普通通的椰汁西米露

炎炎夏日差點會中暑的日子，冰凍的甜點永遠都好受歡迎。夏天的日子每次經過糖水舖，都會見到人頭湧湧，每人面前都有款冰凍甜品，真係望見心都涼呀，嘻嘻！

在家這款港式甜品一向都很受歡迎，無論食的又抑或是煮的，因為實在很容易又慳時間，若果屋企有材料，真係諗到幾時食就幾時食呀！

西米不需清洗，煲滾水，倒入西米，邊倒邊攪，滾起用中小火煮約10mins，中間要不時攪拌避免黏埋一起，熄火蓋上蓋焗至透明約15mins，倒出用凍滾水沖開。

椰汁加牛奶加糖用小火煮至糖溶，放入雪櫃雪至凍，吃時倒入西米和喜歡的水果或雪糕一齊食感覺仲冰涼呢！

煙肉蛋包

周末一早就起身，不要浪費早起的時間，所以即刻換衫落街做運動。一邊做一邊個肚就打鼓，個腦就即刻諗定返到屋企食咩早餐好。做過運動，個心就會諗可以食heavy野，以美味的食物來補充番失去的汗水啊....呵呵！

煙肉腸仔唔健康，但我偏偏就很好鍾意食，所以今天的早餐就是這個

~~ 煙肉蛋包~~

慢烤三文魚柳

朋友煮過俾我同先生食，佢係用橄欖油浸住件三文魚放入焗爐度用慢火焗長時間，簡單黎講就係油浸烤三文魚，出來的效果唔單止唔油膩，仲好柔嫩好滑，魚肉剛剛熟,，入口即溶，好好食呀！

1.  首先將三文魚柳去皮兩面灑少許鹽醃一會，放入焗碟，橄欖油要浸過三文魚面，放入焗爐用100度 - 110度焗約40mins
2.  若油不夠蓋面，要中間翻面，令到上面的魚肉可以受熱，取出將魚稍為滴油
3.  放上碟，落少許black pepper及炸香的蒜粒，灑少許檸檬皮加汁即可享用！

咖哩炒花甲

開Party買左四斤，煮的時候又覺得多左些，剩番一斤隔左一晚，變左兩口子的晚餐喇！

咖喱炒花甲原來好容易，首先燒紅個鑊落油落蒜頭辣椒落去爆香，緊住再落埋香芧，檸檬葉、金不換去炒，跟手落埋咖哩醬炒香就可以落花甲，花甲要炒至微微開蓋就落些少水，蓋鑊蓋至花甲全開口，最後加入適量的椰奶，炒兩炒就可以熄火上碟喇！

廚餘一餐

五顏六色的蔬菜看起來都很吸引，所以每樣都喜歡買一些，每餐吃一些，結果就是每樣都剩一些，星期尾就會煮一餐大雜會....

~ 蔬菜大雜會 ~

返來開飯啦！

丟低了很久很久......是時候乖乖地咁係屋企開飯啦！

牛肉飯啦.....又

唔想又出街食飯,
又唔想出街買餸,
繼續將家裡雪櫃的食物全部吃完才算！

奶 + 蛋

我家的雪櫃沒什麼存貨,
唯獨是牛奶和雞蛋,
無論是早午晚抑或是下午茶,
當我什麼都不想做的時候,
呢兩種食材就是我最好的伴侶,
呢個鮮奶煲雞蛋就是我今天的Brunch啦！